2022.06.09
මානවශාස්ත්‍ර හා සමාජීයවිද්‍යා පීඨයේ තෙවන හා සිව්වන වසර සිසුන් වෙත,
පීඨ මණ්ඩල තීරණ දැනුම් දීම
2022.06.03 වන දින උපකුලපතිතුමාගේ ප්‍රධානත්වයෙන් පැවති මානවශාස්ත්‍ර හා සමාජීයවිද්‍යා පීඨ අධ්‍යයනාංශ ප්‍රධාන රැස්වීමේදී පළමු අර්ධවාර්ෂික පරීක්ෂණ කල්දැමීම පිළිබඳ ශිෂ්‍යයන් සමග සාකච්ඡාව කළ අතර ශිෂ්‍යයන්ට පීඨ මණ්ඩලයේ ඒ පිළිබඳ අදහස් දැක්වීමට අවස්ථාවක් ලබා දෙන ලෙස උපකුලපතිතුමා විසින් දන්වන ලදී. ඒ අනුව, පීඨ ශිෂ්‍ය සංගමය විසුරුවා ඇති අවස්ථාවක, පීඨ මණ්ඩල රැස්වීමට සහභාගීවීමට ශිෂ්‍යයන්ට නිල වශයෙන් අයිතියක් නොමැති වුවද උපකුලපතිතුමාගේ උපදෙස් මත 2022.06.08 වන දින පැවති මානවශාස්ත්‍ර හා සමාජීයවිද්‍යා පීඨ රැස්වීමට විභාග සම්බන්ධ ගැටළු සාකච්ඡා කිරීම සඳහා පැමිණීමට පීඨ ශිෂ්‍ය සංගමයේ පසුගිය නිලධාරී මණඩලයට ආරාධනා කළ නමුත් ඒ සඳහා කිසිවෙකු සහභාගී නොවූ බව නිරීක්ෂණය විය.
මෙදින පැවැති පීඨ මණ්ඩල රැස්වීමේ දී, පළමු අර්ධවාර්ෂික පරීක්ෂණ කල් දැමීම පිළිබඳව පීඨ ශිෂ්‍ය සංගමය විසින් ලිඛිත ඉල්ලීමක් පීඨාධිපති වෙත ඉදිරිපත් කර නොමැති තත්ත්වයක් තුළ 2022.06.02 වන දින සංවිධනය කළ ශිෂ්‍ය විරෝධතාවය පිළිබඳව දීර්ඝ වශයෙන් සාකච්ඡා කළ අතර, සුමංගල ගොඩනැගිල්ල ඉදිරිපිටදී පීඨාධිපතිතුමා සහ ආචාර්ය භවතුන්ට එදින ආමන්ත්‍රණය කළ ආකාරය හා විනය විරෝධී හැසිරීම පිළිබඳව පීඨ මණ්ඩලයේ බලවත් අප්‍රසාදය පළ කිරීමට තීරණය විය.
එහිදී පීඨ මණ්ඩලය විසින් ඒකමතිකව පහත සඳහන් තීරණවලට ද එළඹීමට නිර්දේශ කරන ලදී.
- සමූහ ඡායාරූප සඳහා පීඨාධිපති ඇතුළු ආචාර්යවරුන්ගේ සහභාගීත්වය සිදු නොවීම
- පීඨාධිපති හෝ අධ්‍යයනාංශ ප්‍රධාන මගින් නිකුත් කරනු ලබන චරිත සහතික නිකුත් නොකිරීම
- ශිෂ්‍යත්ව හෝ වෙනත් වරප්‍රසාද සඳහා පීඨාධිපතිගේ හෝ අධ්‍යයනාංශ ප්‍රධානගේ නිර්දේශ ඉදිරිපත් නොකිරීම
- ශිෂ්‍යයන් විසින් සංවිධානය කරන අධ්‍යයන කටයුතු නොවන වෙනත් උත්සව සඳහා සහභාගී නොවීම මින් ඉදිරියටත් මෙවැනි විනය විරෝධී ක්‍රියාමාර්ගවල යෙදුනහොත් පීඨයේ ශිෂ්‍ය විනය පවත්වා ගැනීම සඳහා අවශ්‍ය සියළු ඉදිරි ක්‍රියාමාර්ග ගැනීමට පීඨ මණ්ඩලය විසින් තීරණය කළ බව වැඩිදුරටත් දන්වමි.
මහාචාර්ය ශිරාන්ත හීංකෙන්ද පීඨාධිපති
මානවශාස්ත්‍ර හා සමාජීයවිද්‍යා පීඨය
